No boletim desta edição: encontro no Vaticano pelos dez anos de Amoris laetitia: o Papa pede atenção às fragilidades da família; Leão XIV lança a iniciativa “Um milhão de crianças reza o Rosário”; a intenção de oração para o mês de outubro.
HEBDÓMADA PAPAE” NOTÍTIAE VATICÁNAE LATÍNE RÉDDITAE Die décimo mensis Octóbris anno bismillésimo vicésimo sexto TÍTULI Convéntus in Civitáte Vaticána décimo anniversário occurrénte ab édita Adhortatióne Apostólica Amóris laetítia: Papa monet ut singuláris cura famíliae fragilitátibus adhibeátur.
Leo décimus quartus áperit incéptum “Décies centéna mília puerórum una simul Rosárium precántur” ac pacis donum implórat.
Precatiónis propósitum mense Octóbri ad pastorálem curam de mentis valetúdine réspicit.
Salútem plúrimam ómnibus vobis auscultántibus núntios Latínos dicit Alexánder De Carolis. [ Audio Embed Ouça as notícias do Vatican News em latim] NOTÍTIAE Décimo anniversário recurrénte ab édita Adhortatióne apostólica postsynodáli Amóris laetítia, Papa Leo décimus quartus die séptimo mensis Octóbris praetérito, in Civitáte Vaticána convéntum apéruit ad disseréndum de Papae Francísci documénto, ad quem cóniuges, Ecclesiárum orientálium Epíscopi necnon Conferentiárum episcopálium Prǽsides convenérunt.
De hac re nobis refert Rosárius Tronnolone. “Conversiónis memóriae”, “inopináti fructus et relatiónes”, sed etiam “difficultátes” et “quaestiónes”.
Haec ómnia éminent decem annis elápsis cum Ecclésia a Papa Francísco Adhortatiónem Apostólicam Amóris laetítia accépit.
Leo Papa haec ipsa in lúmine pósuit, cum in Áula Páuli sexti cogitatiónes de documénto inchoáret.
Propósitum, sícuti ipse títulus narrat, id enim manet – scílicet “Evangélium una cum famíliis nuntiáre”; secúndum Románum Pontíficem haec comparátio — quae usque ad diem décimum quartum mensis Octóbris protrahétur — eo spectat “ut agnoscátur quid Deus inter nos agat et quo eius Spíritus Ecclésiam hódie ducat”. “Multum profécto a famíliis discéndum” habémus, asseverávit Leo décimus quartus, atque praesértim fragilitátis arguméntum merétur, ut Ille ait, “eam singulárem curam”, quae est “commúnis condício” non solum a famíliis, sed est tantum ab ipsa quoque Ecclésia probáta; haec res póstulat ut ínvicem audiátur, diálogus foveátur ac discerniméntum adhibeátur ad fructus colligéndos et ad difficultátes, quae adhuc manent, superándas.
Die primo mensis Octóbris praetérito, Leo décimus quartus in Hortis Vaticánis incéptum apéruit “Décies centéna mília puerórum una simul Rosárium precántur”, quod a Pontifícia fundatióne “Auxílium Christiánis tribulántibus” promótum est atque ad párvulos totíus orbis terrárum patefáctum est.
Summus Póntifex pro pace orávit, praesértim in iis regiónibus ubi bellum púeros immánius vexat.
Refert nobis Xavérius Sartre.
Décies centéna mília puerórum participántes, quod signíficat “quinquágies centéna mília precatiónum Ave Maria, quae ex ómnibus terrárum pártibus omnibúsque linguis in Caelum ascéndunt”.
Leo décimus quartus manus complúres parvulórum ac maiórum stringit, cum post merídiem ad Cryptam Lapurdénsem in Hortis Vaticánis ádvenit.
Hoc incéptum anno bismillésimo quinto Carácis ortum est, verbis sancti Pii excitátis: “Si décies centéna mília puerórum una simul Rosárium recitáverint, mundus immutábitur”.
Hódie ergo, ut ipse Leo Papa asseverávit, hīc uníti sumus “in unam grandíssimam Rosárii corónam, ut omnes continéntes, gentes ac natiónes orbis terrárum complectámur ac inter se adstringámus”.
Mariána precátio in collóquium inter púeros mutátur, quod Papa conclúdit Iesum ac Vírginem invócans: “A vobis singuláre donum pétimus: pacem ómnibus orbis terrárum púeris, praesértim iis qui in illis regiónibus degunt ubi bellum furit, in tot terrae pártibus”.
NOTÍTIAE BREVÍSSIMAE Ut Ecclésia domus sit hospitális iis qui anxietáte et ánimi demissióne labórant.
Hoc est votum a Summo Pontífice significátum in núntio televisífico una cum intentiónibus precatiónis próximo mense Octóbri, in quo Leo décimus quartus véniam petit quod “óculos avertérimus” aut “vultum detteruérimus” et “discrímen fovérimus” erga eos qui morbi mentis calvárium patiúntur; hic morbus, iuxta datis a Mundiáli Societáte pro Salúte vulgátis, hódie plus quam décies mílies centéna mília hóminum áfficit.
Sanctus Francíscus nos impéllit ut pacem implorémus ac “discórdiae rimas” inter pópulos sanémus.
Hoc Románus Póntifex in Salutatióne Angélica die domínico quarto mensis Octóbris locútus est, cum octingentésimum anniversárium annum ab óbitu eiúsdem Sancti Assisiénsis, Itáliae patróni, memoráret.
Haec háctenus, próxima hebdómada núntios Latínos rursus habébitis.
Valéte!
