O resumo das notícias do Vaticano em latim: os destaques de hoje incluem a Missa de Natal presidida pela primeira vez pelo Papa Leão XIV na Basílica de São Pedro; o Angelus do último domingo e a bênção do Menino Jesus; na terça-feira, 23 de dezembro, o Papa conversou com jornalistas em Castel Gandolfo.
HEBDOMADA PAPÆ Notitiæ Vaticanæ latine redditæ Die vicésimo séptimo mensis Decémbris anno bismillésimo vicésimo quinto TITULI Leo Quartus Décimus primum præsédit Missæ in Nativitáte Dómini Nostri Iesu Christi in Basilica Sancti Petri. Salutátio Angélica superióris diéi domínicæ et benedíctio simulacrórum Iesu infántis. Papa diurnáriis respóndet Arce Gandúlphi: «Saltem in sollemnitáte Nativitátis Salvatóris dies pacis observétur». Salútem plúrimam ex corde dicit Eugenius Murrali ómnibus vobis, qui optáti audítis núntios Latína lingua prolátos. NOTITIAE Postquam plus quam quinque mília fidélium in Foro Petriáno salutávit, Póntifex Missæ præsédit in Nocte Sancta in Nativitáte Dómini Nostri Iesu Christi in Basílica Papáli. Omnia refert Rosarius Tronnolone. Ut Salvatórem inveniámus, nobis non est sursum spectándum, sed contemplándum deórsum: «omnipoténtia Dei in impoténtia infántis fulget». In homília ad fidéles in Basílicam Sancti Petri convéntos necnon ad omnes, qui Missam intra Forum et ubíque per terrárum orbem sunt secúti, observávit Papa Púerum pannis involútum esse «astrum, quod mundum admirátur. Rénovans etiam verba a Benedícto Décimo Sexto in Nocte Sancta in Nativitate Dómini Nostri Iesu Christi anni bismillésimi décimi secúndi dicta, memorávit: «In terra locus non est Deo, nisi est locus hómini; unum non accípere est non accípere álterum». Postquam sanctum Augustinum commemorávit, qui superbiæ humanæ oppónit humilitatem divinam, dixit Póntifex: «Dum prava oeconómia hómines tamquam merces indúcit tractáre, Deus nobis símilis fit, infinítam hóminis cuiúsque dignitátem revélans». Dénique ad verba rédiit, quibus superióre anno Francíscus Papa Nativitátem Dómini et inítium Iubilæi comitátus est sub signo spei, quæ non confúndit. Quam eándem spem – conclusit Papa Leo – Iesus in nobis accéndit «núntios pacis nos fáciens». Domínica vicésima prima mensis Decémbris, ad Salutatiónem Angélicam in Foro Petriáno, Leo Papa virtútes éxtulit sancti Ioseph. Ómnia nobis refert Silvia Guidi Litúrgia domínicæ quartæ Advéntus in Ioseph sponsum Maríæ inténdit. «Quæ eum nobis osténdit – pandit Papa – quo témpore præsértim Deus in sómniis missiónem ei revélat (Mt 1, 18-24), ita nobis propónens pulchram históriæ salútis páginam, ubi primas partes homo agit frágilis et erratúrus, sicut nos sumus, sed simul ardens et fortis fide». In Ioseph profundíssimum observántiæ eius religiósæ agnóscimus sensum: sensum scílicet misericórdiæ. In eo enim pietátem et caritátem repérimus, misericórdiam et fidúciam in Deo. Post Salutatiónem Angélicam, Póntifex pueros in Foro Petriáno congregátos appellávit eorúmque Iesu Infántis parva simulácra benedíxit: «Púeri caríssimi, coram præsépi oráte Iesum etiam pro intentiónibus Papæ. Et potíssimum simul orémus, ut omnes púeri mundi in pace vivere possint». NOTITIÆ BREVIORES Féria tértia Arce Gandúlphi Papa quæsítis diurnariórum respóndit extra Villam Barberini. Ex arguméntis Ucráina fuit. Póntifex mærórem suum dixit propter recusátas a Rússia indútias domínicæ Nativitatis causa et íterum mónuit, ut tempus vigínti et quattuor horárum pacis observarétur. Finis fit hæc loquéndi: ómnibus sint felícia Nativitátis domínicæ festa. Cétera nova próxima hebdómada. Valéte!